Fréttir

Nú styttist óðfluga í að ný hrútaskrá líti dagsins ljós. Að vanda verða í kjölfarið haldnir kynningarfundir um allt land á vegum búnaðarsambandanna. Sauðfjárræktarráðunautar RML munu mæta á fundina og kynna hrútakostinn, ræða um ræktunarstarfið og ýmislegt fleira. Fyrirkomulag sæðinga verður kynnt auk þess sem sum búnaðarsamböndin verða með viðbótarefni á sínum fundum.

Niðurstöður skýrslnanna í nautgriparæktinni í október 2013 hafa nú verið birtar á vef okkar. Þegar niðurstöðurnar urðu til á miðnætti aðfaranótt 11. nóvember var búið að skila skýrslum októbermánaðar frá 92% hinna 584 búa sem skráð eru í skýrsluhaldið. Reiknuð meðalnyt 21.033,5 árskúa var 5.646 kg síðastliðna 12 mánuði sem er 15 kg meira en við lok september.

Hagræðingarhópur ríkisstjórnarinnar hefur skilað frá sér tillögum sínum en þær taka til allra helstu þátta ríkisrekstrarins og allra stærri þjónustu- og stjórnsýslukerfa ríkisins. Hagræðingarhópurinn hefur ekki lagt áherslu á beinar niðurskurðartillögur heldur á kerfisbreytingar sem beinast að breytingum á áherslum, aðferðum og skipulagi. Í hagræðingarhópnum, sem skipaður var í byrjun júlí 2013, eru Ásmundur Einar Daðason, alþm., sem er formaður hópsins, Guðlaugur Þór Þórðarson, alþm., Vigdís Hauksdóttir, alþm. og Unnur Brá Konráðsdóttir, alþm. Með hópnum hafa starfað sérfræðingar úr forsætis- og fjármálaráðuneyti. Helstu tillögur hópsins sem snerta landbúnaðarmál má sjá hér á eftir:

Niðurstöður tilboðsmarkaðar greiðslumarks í mjólk 1. nóv. 2013 hafa verið birtar á vef Matvælastofnunar. Jafnvægisverðið reyndist 320 kr. fyrir hvern lítra mjólkur. Alls bárust Matvælastofnun 42 tilboð um kaup eða sölu á greiðslumarki og var framboðið magn 1.034.438 lítrar en boðið var í 1.067.714 lítra. Kauphlutfall viðskipta reyndist 96,44%.

Fagráð í hrossarækt starfar samkvæmt 15. gr. búnaðarlaga nr. 70/1998. Fagráð fer, meðal annarra verkefna, með stjórn Stofnverndarsjóðs sem starfræktur er samkvæmt ákvæðum í sömu lögum og reglugerð nr. 470/1999 um sama efni.

Búið er að taka niðurstöðurnar úr skoðun sona sæðingastöðvahrútanna haustið 2013 saman fyrir allt landið.

Afkvæmarannsóknir á hrútum, með tilliti til kjötgæða hafa verið stundaðar meðal bænda með góðum árangri í áraraðir. Styrkur til slíkra rannsókna er veittur af fagfé sauðfjársamningsins og gilda sömu reglur í haust og síðustu ár. Skilyrðið er að á búinu séu 8 hrútar að lágmarki í samanburði þar sem hver hrútur á 8 ómmæld afkvæmi af sama kyni og 15 lömb með sláturupplýsingar. Styrkurinn er 10.000 kr. og verður hann greiddur beint til bænda. Líkt og fjallað var um í Bændablaðinu fyrr í haust þá þurfa bændur að senda staðfestingu í tölvupósti á ee@rml.is um að uppgjöri í Fjárvís sé lokið. Miðað var við 31. október en ákveðið hefur verið að framlengja þann frest til 15. nóvember nk.

Vali sæðingastöðvahrúta fyrir veturinn 2013-2014 er nú lokið. Afkvæmarannsóknir voru gerðar á nokkrum stöðum núna í haust og á grunni þeirra bættust við 9 hrútar, 3 kollóttir og 6 hyrndir. Alls verða því 20 nýir hrútar í boði á sæðingastöðvunum næsta vetur. Frekari umfjöllun um nýja hrúta verður í hrútaskrá næsta árs sem mun koma út um miðjan nóvember.

Enn eru nokkur sæti laus í áður auglýstum „Sauðfjárskóla“ sem verður næst í boði á Suðurlandi og í Skagafirði. Áhugasamir hafi samband við Árna B. Bragason í gegnum netfangið ab@rml.is eða í síma 516-5000 sem fyrst.

Íslandsmethafinn í æviafurðum, Mókolla 230 á Kirkjulæk í Fljótshlíð, var felld í sumar sökum elli eftir að hafa átt fádæma farsæla ævi sem mjólkurkýr. Mókolla fæddist 7. apríl 1996 og bar sínum 1. kálfi 24. október 1998 en alls bar hún 13 sinnum. Hún mjólkaði samtals 114.635 kg mjólkur á 14,7 árum eða 7.824 kg á ári að jafnaði.