Fréttir

Bændur eru hvattir til að draga það ekki að panta skoðun á lömbin því það auðveldar allt skipulag að pantanir liggi fyrir sem fyrst. Því fyrr sem menn panta því meiri líkur eru á að hægt sé að verða við óskum þeirra og öll framkvæmd verður hagkvæmari. Miðað hefur verið við að raða þeim bæjum fyrst niður sem pantað hafa fyrir 15. ágúst.

Það er mikilvægt að láta efnagreina gróffóður því það er uppistaðan í fóðri grasbíta. Það er margt sem hefur áhrif á gæði gróffóðurs eins og áburðagjöf, veðurfar, sláttutími og grastegundir. Þetta er breytilegt á milli ára og það getur verið erfitt að meta næringargildi fóðursins án þess að láta efnagreina það.

Síðsumarsýning kynbótahrossa á Sauðárkróki fer fram dagana 19. - 21. ágúst. Dómar hefjast kl 13:00 miðvikudaginn 19. ágúst. Búið er að birta hollaröðun hér á vefnum undir Búfjárrækt > Hrossarækt > Röðun hrossa á kynbótasýningum. Eigendur og sýnendur eru beðnir að mæta tímanlega með hrossin til dóms þannig að dómstörf gangi sem greiðast fyrir sig og tímasetningar haldist sem best.

Fjárvís var uppfærður um mánaðarmótin mars/apríl á þessu ári og allt viðmóti í kerfinu breyttist líkt og notendur ættu að hafa orðið varir við. Kerfið er ekki gallalaust og unnið er að því að fínstilla kerfið, það tekur tíma og mikilvægt að notendur láti vita um hluti sem ekki virðast vera réttir. Tvær villur fundust ekki fyrr en notendur fóru að nota kerfið enda misjafnt hvaða vinnulag er notað við skráningar. Þessar villur þurfa notendur sjálfir að athuga á sínum búum, hvort þær gildi um gripi þar og leiðrétta ef þarf.

Eins og áður hefur komið fram hér á heimasíðu RML líður að því að ráðunautar fari um sveitir og bjóði upp á heysýnatöku. Vothey þarf að verkast í 6-8 vikur frá hirðingu þar til sýni er tekið, en sé þurrefnisinnihald komið upp undir og yfir 50% í fóðrinu má það bíða styttri tíma frá hirðingu þar sem minni breytingar verða á fóðrinu vegna gerjunar.

Nú hafa verið birtar hér á heimasíðunni uppfærðar verðskrár á heyefnagreiningum hjá Efnagreiningu ehf á Hvanneyri og BLGG í Hollandi. Þær er að finna undir Nytjaplöntur > Fóður og fóðrun > Verðskrár. Vegna hagstæðs gengis lækkar verð á heyefnagreiningum hjá BLGG frá því síðasta vetur. Þá er búið að opna nýja efnagreiningarstofu á Hvanneyri, Efnagreiningu ehf, en hún tekur við heysýnum til greiningar frá því um 20. ágúst nk.

Niðurstöðurnar úr skýrslum nautgriparæktarinnar fyrir júlí sl. eru nú orðnar aðgengilegar á vef okkar. Þegar þær niðurstöður sem nú birtast urðu til laust fyrir hádegi þann 11. ágúst var búið að skila skýrslum fyrir júlí frá 91% þeirra 578 búa sem nú eru skráð til þátttöku í skýrsluhaldinu. Reiknuð meðalnyt 22.979,0 árskúa á fyrrnefndum 91% búanna, var 5.761 kg (5.737 kg í júní) sl. 12 mánuði. Meðalfjöldi árskúa á þessum búum við uppgjörið nú var 43,7.

Síðasti skráningardagur á kynbótasýningar síðsumars er í dag 10. ágúst. Skráning verður opin til miðnættist. Sýningarnar sem um ræðir eru á Miðfossum, Sauðárkróki og Selfossi dagana 17. -21. ágúst, náist lágmarksfjöldi á sýningarnar. Skráning og greiðsla fer fram í gegnum netið á síðunni www. worldfengur.com þar sem valið er „skrá hross í kynbótasýningu“. Einnig er hægt að skrá í gegnum heimasíðuna www.rml.is en á forsíðunni hægra megin er valmyndin „skrá á kynbótasýningu“. Leiðbeiningar um rafræna skráningu á kynbótasýningu má finna á heimasíðunni undir búfjárrækt/hrossarækt/kynbótasýningar. Starfsmenn RML munu leiðbeina þeim sem þess þurfa í síma 516-5000, einnig er hægt að senda t-póst á netföngin lr@rml.is og halla@rml.is.

Á Handverkshátíðinni á Hrafnagili sem hófst í gær fer fram kynning og fræðsla um landbúnað í Eyjafirði. Það eru Ráðgjafarmiðstöð landbúnaðarins, Búnaðarsamband Eyjafjarðar, Félag ungra bænda og búgreinafélög héraðsins í hrossa, kúa og sauðfjárrækt, sem standa að þessu framtaki.

Nú eru bændur víða búnir með fyrri slátt og vilja senda hirðingasýni til efnagreiningar. RML tekur við hirðingasýnum frá bændum og sendir áfram til greiningarstofa. Tvær leiðir eru í boði; annars vegar að senda til BLGG í Hollandi eða til Efnagreiningar á Hvanneyri. Báðar stofurnar bjóða upp á 10 daga skilafrest niðurstaðna og svipaðar greiningalausnir. Verðskrá hjá Efnagreiningu er ekki enn tilbúin en þar verður hægt að senda til greiningar fljótlega upp úr miðjum ágústmánuði. Verðskrá BLGG er sem fyrr hér á RML.is undir Nytjaplöntur.