Fréttir

Óskað er eftir að bændur sendi inn rekstrargögn núna, vegna rekstrarársins 2014 og fyrr. Í framhaldinu verði svo send inn gögn í kjölfar skila á VSK-skýrslum og skattframtali.

Síðastliðinn vetur litu dagsins ljós bæklingar sem ætlaðir eru til ráðgjafar vegna ættliðaskipta í landbúnaði, á vef RML. Aðgengilegir voru bæklingar sem veittu almennar upplýsingar ásamt því að til boða voru rafrænir vegvísar gegn gjaldi. Nú eru þeir vegvísar aðgengilegir á netinu, endurgjaldslaust.

Dagana 16.-17. september var haldið svokallað NorFor Workshop en það er vinnufundur sem NorFor býður ráðunautum aðildarlandanna að sækja. Skipulagið er sett upp af NorFor og tengiliðum hvers lands sem sjá bæði um hagnýt og fagleg atriði skipulagsins.

Dagana 10. og 11. september fór fram hinn árlegi fundur NorFor þar sem koma saman stjórn NorFor sem hefur á að skipa fólki frá aðildarlöndunum fjórum (Noregi, Danmörku, Svíþóð og Íslandi) sem og fulltrúar þeirra sem vinna með kerfið, en löndin hafa öll sína tengiliði sem vinna í mismunandi hópum innan NorFor og sjá um að upplýsa ráðunauta í viðkomandi landi um uppfærslur og breytingar sem eiga sér stað.

Nú eru komnar niðurstöður úr um 150 heysýnum sem send voru til greiningar hjá BLGG í Hollandi. Ríflega þrír fjórðu sýnanna eru af Suðurlandi og hefur ágætt heyskaparsumar sunnanlands því mikil áhrif á meðaltöl heysýnanna enn sem komið er.

Niðurstöður afurðaskýrsluhaldsins í nautgriparæktinni fyrir ágúst sl. hafa nú verið birtar á vef okkar. Þegar þær niðurstöður urðu til laust fyrir hádegi þ. 11. september, höfðu borist skýrslur frá 93% þeirra 578 búa sem skráð voru til þátttöku í skýrsluhaldinu. Reiknuð meðalnyt 23.385,9 árskúa á þessum 93% búanna, var 5.790 kg á síðustu 12 mánuðum.

Í síðustu viku var haldið umfangsmikið námskeið á Stóra-Ármóti fyrir starfsmenn RML er koma að lambadómum og ráðgjöf í sauðfjárrækt. Námskeiðið hófst um hádegi á miðvikudaginn 2 . september en þá mættu nýir lambadómarar í þjálfun hjá þeim Eyþóri Einarssyni og Fanneyju Ólöfu Lárusdóttur.

Fagráð í nautgriparækt hefur ákveðið að frá og með 1. október n.k. verði takmörkunum á dreifingu sæðis úr Bamba 08049 og Flekk 08029 aflétt og þeir til frjálsra afnota svo lengi sem sæði úr þeim er til. Hugsunin með þessari stýringu var að kalla eftir skipulegu vali bænda á kúm sem sæddar væru með sæði úr þessum nautum og tóm gæfist til þess óháð burðartíma. Það er ljóst að það hefur tekist og notkun, sérstaklega Bamba, hefur dreifst á lengri tíma og val hans á kýr orðið markvissara og betra en ella.

Í lambabókum sem prentaðar voru út í síðustu viku er að finna villu sem felst í því að talnarunan sem lýsir frjósemi ánna er yfir höfuð röng. Þetta lýsir sér m.a. í því að upplýsingar um gemlingsárið (um ærnar veturgamlar) eru vitlausar hjá öllum ánum. Búið er að laga þessa villu inn í Fjárvís.is og mun hún ekki birtast í þeim bókum sem prentaðar verða hér eftir. Tekið skal fram að villan hafði engin áhrif á kynbótamatsútreikninga fyrir frjósemi.

RML og Bústólpi hafa gert samkomulag um gerð fóðuráætlana og ráðgjöf til bænda í haust. Með samkomulaginu hyggst Bústólpi bjóða sínum tryggu fóðurkaupendum fría grunnþjónustu við fóðuráætlanagerð, sem felst í töku heysýna, efnagreiningu og gerð grunnfóðuráætlunar.