Haustuppgjör 2015 - tilkynning til þeirra sem hafa skilað haustgögnum

Enn er unnið að því að ganga frá haustskýrslum sauðfjárræktarinnar eftir breytingar á FJÁRVÍS fyrr á þessu ári. Því eru engar uppgjörsskýrslur aðgengilegar fyrir árið 2015. Unnið er í því þessa daganna að yfirfara uppgjörið og hvort allir útreikningar komi réttir. Reiknað er með að því geti verið lokið í lok næstu viku (16. - 20. nóv.). Bændum er samt óhætt að ganga frá haustskilum en uppgjörið verður reiknað fyrir alla sem hafa skilað um leið og það verður klárt.

Samhliða þessari vinnu er verið að gera nokkrar breytingar á haustuppgjörinu. Sem dæmi verða skilgreindar forystuær ekki hafðar með í afurðauppgjöri (grunnur þess verður ætternisgrunnur forystufjár frá 2008 og gripir skv. þeim grunni sem eru meira en 50% af forystufjárkyni verða undanskildir uppgjöri). Þá er verið að lagfæra uppgjörshópa þannig að gemlingslömb og einlembingar á hverju búi verða gerðir upp sem sérhópar ásamt ýmsum fleiri smávægilegum atriðum. Meðan verið er að ganga úr skugga um að þessir hlutir reiknist og vinni eðlilega verða engar skýrslur aðgengilegar fyrir notendur FJÁRVÍS.

/eib