Niðurstöður úr skýrslum nautgriparæktarinnar í apríl 2014

Gilitrutt 378, móðir Sússa 05037

Niðurstöðurnar úr skýrslum nautgriparæktarinnar í apríl 2014 hafa nú verið birtar á vef okkar. Þegar niðurstöðurnar sem nú birtast urðu til á miðnætti aðfaranótt 12. maí var búið að skila skýrslum fyrir síðastliðinn mánuð frá 93% þeirra 578 búa sem nú eru skráð til þátttöku í skýrsluhaldinu. Reiknuð meðalnyt 21.122 árskúa síðastliðna 12 mánuði var 5.675 kg en var 5.655 kg mánuðinn á undan. Meðalfjöldi árskúa á búunum sem skýrslum hafði verið skilað frá á miðnætti aðfaranótt 12. maí var 39,3 og hafði ekki breyst frá seinsta uppgjöri.

Mest meðalnyt á síðustu 12 mánuðum var á búi Sigurðar og Báru í Lyngbrekku á Fellsströnd, sama búi og undanfarna tvo mánuði. Nytin þar var nú 7.917 kg eftir árskú. Annað í röðinni við uppgjörið núna var bú Stóru-Tjarna ehf. á Stóru-Tjörnum í Ljósavatnsskarði, sem einnig var annað í röðinni við síðasta uppgjör, en þar reiknaðist nytin 7.770 kg á árskú. Þriðja búið og enn hið sama og fyrir mánuði síðan, var bú Brúsa ehf. á Brúsastöðum í Vatnsdal, en þar var reiknuð meðalnyt núna 7.761 kg á árskú. Fjórða búið í röðinni í þetta sinn var bú Jóns og Hrefnu á Hóli í Sæmundarhlíð með reiknaða meðalnyt eftir árskú 7.610 kg. Þetta bú var einnig í sama sæti við uppgjör marsmánaðar. Hið fimmta í röðinni var bú Helga Bjarna Steinssonar á Syðri-Bægisá í Öxnadal en þar var nytin 7.507 kg eftir árskúna. Á 30 búum reiknaðist meðalnytin nú 7.000 kg eða meiri og var það sami fjöldi búa og við síðasta uppgjör.

Nythæsta kýrin á seinustu 12 mánuðum var Elma nr. 379 í Leirulækjarseli á Mýrum (f. nr. 332 undan Þrasa 98052) en hún mjólkaði 11.928 kg. Elma var einnig efst á þessum lista fyrir mánuði síðan. Önnur í röðinni var kýr nr. 471 í Lyngbrekku á Fellsströnd (f. Völusteinn 06020), sem mjólkaði 11.868 kg á tímabilinu. Hún var í þriðja sæti á listanum eftir uppgjör marsmánaðar. Þriðja kýrin í röðinni var Vigga nr. 374 á Egg í Hegranesi en nyt hennar var 11.786 kg sl. 12 mánuði. Hin fjórða í röðinni núna var Dimmalimm nr. 379 (f. Kistill 00017) í Garðakoti í Hjaltadal í Skagafirði en hún skilaði 11.608 kg á uppgjörstímabilinu. Fimmta kýrin var Huppa nr. 1123 (f. Kappi 01031) á Stóra-Ármóti í Flóa sem mjólkaði 11.526 kg. Huppa var fjórða á listanum eftir uppgjör mars sl. Ellefu kýr mjólkuðu yfir 11.000 kg síðustu 12 mánuði en í mars voru þær níu.

Sjá nánar:
Niðurstöður skýrslnanna í nautgriparæktinni

/sk