Þriðja ARR uppsprettan staðfest

21-117 frá Skammadal

Þriðja ARR uppsprettan staðfest

Staðfest hefur verið nýtt upphafsbú ARR genasamsætunnar. Það er í Skammadal í Mýrdal, þar sem þau Lára Oddsteinsdóttir og Jóhann Pálmason standa fyrir búi. Má því segja að nú sé þriðja ættlínan komin fram sem ber hina verndandi genasamsætu ARR.

Mikill akkur er í því að fá inn fleiri upphafsbú og ekki síst þar sem hér er um hyrndan stofn að ræða. Það auðveldar verkefnið framundan í innleiðingu verndandi arfgerða á ýmsan hátt. Það að ARR finnst nú í Mýrdalnum vekur vissulega vonir um að ARR leynist víðar. Þá má geta þess að nú eru þeir staðir þar sem hinir mögulega verndandi breytileikar hafa fundist, T137 og C151, orðnir drjúg margir. Það er því ástæða til að hvetja bændur til þess að vera áfram duglegir að taka sýni úr hjörðum sínum því ófundnir fjársjóðir geta víða leynst.

Séu bændur í hugleiðingum um frekari leit í sínum stofni eða hafa einhverjar spurningar tengdar arfgerðargreiningum, áhugaverðum niðurstöðum eða ræktun fyrir þoli gegn riðu almennt eru ráðunautar RML boðnir og búnir til aðstoðar.

Í Skammadal hefur verið staðfest ARR í tveimur ám og einum gemlingi:
24-424, hvít, hyrnd. F: Jaður 20-891 frá Múlakoti M: 22-224 frá Skammadal 2
22-224, hvít, hyrnd. F: Krókur 18-080 frá Efstu-Grund M: 17-719 frá Skammadal 2
21-117, svarbotnótt, hyrnd. F: Blossi 16-837 frá Teigi M: 17-719 frá Skammadal 2

ee/agg