Sérstakur stuðningur vegna greiningar áa á áhættubúum

Samkvæmt nýgerðum samningi milli RML og atvinnuvegaráðuneytisins um riðuarfgerðargreiningar er gert ráð fyrir sérstökum stuðningi vegna greininga á fullorðnum ám á áhættubúum.

Markmiðið með þessum sérstaka stuðningi er að draga úr tíðni VRQ-genasamsætunnar í hjörðum sem skilgreindar eru samkvæmt MAST sem áhættuhjarðir. Áætlað að niðurgreiðsla á hvert sýni sé 1.000 kr., þó með þeim fyrirvara að fjármunir sem ætlaðir eru í verkefnið dugi.

MAST hefur þegar flokkað alla bæi með tilliti til áhættu. Samkvæmt landsáætlun um útrýmingu riðuveiki eru bæir skilgreindir sem áhættubú ef þeir hafa faraldsfræðilega tengingu við riðubæ og gildir sú skilgreining í sjö ár frá uppkomu riðuveikinnar. Bændur geta kynnt sér flokkunartöflu í landsáætluninni (bls. 21) eða haft samband við Mast ef þeir eru óvissir um hvaða áhættuflokki þeirra bú tilheyrir en flokkun búa verður ekki gerð opinber fyrr en ný reglugerð um útrýmingu riðuveiki hefur tekið gildi.

Bændur á áhættubúum eru hvattir til að nýta sér þennan stuðning til að hraða uppbyggingu á þolnum riðustofni og draga úr tíðni VRQ-genasamsætunar eins og kostur er.

/okg