Fallegasta kýrnafnið valið á Sveitasælu í Skagafirði

Sveitasæla í Skagafirði fór fram um helgina eins og margir vita. RML var með sýningarbás á staðnum og kynnti starfsemi sína fyrir gestum og gangandi.

Þar var hægt að kjósa um fallegasta kýrnafnið, fólk einfaldlega skrifaði á blað það kýrnafn sem því fannst fallegast og setti í pottinn. Þátttaka í kosningunni var mjög góð og alls komu 76 nöfn í pottinn. Ljómalind var það nafn sem flestir tilnefndu og fær því titilinn fallegasta kýrnafnið að mati gesta Sveitasælu 2015. Mörg hefðbundin kýrnöfn voru tilnefnd eins og Búkolla, Huppa, Skjalda, Gjöf, Lukka og Krossa. Einhverjir hafa greinilega skellt sér á leiksýningu sumarsins hjá Leikhópnum Lottu því Rjómalind fékk nokkur atkvæði. Eins voru nefnd óhefðbundin nöfn sem eru líklega ekki algeng í fjósum eins og Glimmer, Dúfa, Mjóna, Súrmjólk og Skrudda. Það yrði of langt mál að telja upp öll fallegu og skrítnu nöfnin sem komust á blað en viljum við þakka gestum Sveitasælu fyrir þátttökuna og tilnefnum hér með Ljómalind sem fallegasta kýrnafnið.

boo/okg